ಔಷಧಿ ಕೊಡುತ್ತಾನೆ ಎಂದು ನಂಬಿ ಮನೆಗೆ ಕರೆದವ ದಂಪತಿಗಳಿಗೆ ಮಾಡಿದ್ದೇನು ? ಕೈ ಕಾಲು ಸೊಂಟಕ್ಕೆ ಹಚ್ಚಿದ ಎಣ್ಣೆ , ಕುಡಿಸಿದ ದ್ರವ ಯಾವುದು ?

ಅಂಕೋಲಾ: ಪ್ಯಾರಾಲಿಸೀಸ್ ಆದವರಿಗೆ ಮತ್ತು ಕಾಲು ನೋವು ಸೊಂಟ ನೋವಿಗೂ ಔಷದಿ ನೀಡುವುದಾಗಿ ಬಂದ ಅಪರಿಚಿತ ವ್ಯಕ್ತಿಯೋರ್ವನನ್ನು ಮನೆಯ ಒಳಗೆ ಕರೆದುಕೊಂಡು ,ದಂಪತಿಗಳಿಬ್ಬರು ಮೋಸ ಹೋಗಿ ಸಾವಿರಾರು ರೂ ಕಳೆದುಕೊಂಡು, ಪಶ್ಚಾತಾಪ ಪಡುವಂತಾದ ಘಟನೆ ತಾಲೂಕಿನ ಭಾವಿಕೇರಿಯಲ್ಲಿ ನಡೆದಿದೆ.

ಜನವರಿ 26 ರಂದು ಬೆಳಿಗ್ಗೆ ಭಾವಿಕೇರಿ ನಿವಾಸಿ ವೀಣಾ ನಾನಾ ಭಟ್ಟ ಅವರ ಮನೆಗೆ ಅಪರಿಚಿತ ವ್ಯಕ್ತಿಯೋರ್ವ ಬಂದು ಪಾರ್ಶ್ವವಾಯು ಮತ್ತು ಅಂಗಾಗ ನೋವಿಗೆ ಔಷದಿ ನೀಡುವುದಾಗಿ ತಿಳಿಸಿದ್ದು, ಅದನ್ನು ನಂಬಿ ವೀಣಾ ಭಟ್ಟ ಅವರು ತಮ್ಮ ಅತ್ತೆಗೆ ಪಾರ್ಶ್ವವಾಯು ಆಗಿರುವುದರಿಂದ ಆ ವ್ಯಕ್ತಿಗೆ ಮನೆ ಒಳಗೆ ಕರೆದು ಅತ್ತೆಯನ್ನು ತೋರಿಸಲು , ಅವರನ್ನು ನೋಡಿದ ಅಪರಿಚಿತ ವ್ಯಕ್ತಿ ನಿಮ್ಮ ಅತ್ತೆಯವರಿಗೆ ಒಂದು ಬದಿ ಸಂಪೂರ್ಣ ಪ್ಯಾರಾಲಿಸೀಸ್ ಆಗಿರುವುದರಿಂದ ತಾನು ಕೊಡುವ ಔಷದಿ ಅವರಿಗೆ ನಾಟುವುದಿಲ್ಲ ಎಂದು ತಿಳಿಸಿದ್ದು , ಆಗ ವೀಣಾ ಭಟ್ಟ ಅವರು ತನಗೆ ಮತ್ತು ತಮ್ಮ ಪತಿಗೆ ಕೈ ಕಾಲು ಸೊಂಟ ನೋವು ಇದೆ ಅಂತಾ ಹೇಳಲು , ಸಂಶಯಾಸ್ಪದ ವ್ಯಕ್ತಿ ಇದಕ್ಕೆ ತನ್ನ ಹತ್ತಿರ ಔಷದ ವಿದ್ದುನಿ ಯಮಿತದಂತೆ ಇದನ್ನು ಬಳಸಿದರೆ ವಾಸಿಯಾಗುತ್ತದೆ ಅಂತಾ ಹೇಳಿ , ವೀಣಾ ಭಟ್ಟರ ಕಾಲಿಗೆ ಯಾವುದೋ ಒಂದು ರೀತಿಯ ಎಣ್ಣೆಯನ್ನು ಹಚ್ಚಿದ್ದಲ್ಲದೇ ಅವರ ಪತಿಯ ಸೊಂಟಕ್ಕೂ ಅದೇ ಔಷಧಿ ಹಚ್ಚಿ ಹಚ್ಚಿ , ನಂತರ ನೀರು ತರಹ ಇರುವ ಯಾವುದೋ ಒಂದು ದ್ರವ ಪದಾರ್ಥವನ್ನು ಕುಡಿಯಲು ಕೊಟ್ಟನು ಎನ್ನಲಾಗಿದೆ.

ನಂತರ ಆ ಅಪರಿಚಿತ ವ್ಯಕ್ತಿ ತಾನು ನೀಡಿದ ಔಷದಿಗೆ 63 ಸಾವಿರ ರೂಪಾಯಿ ನೀಡುವಂತೆ ಕೇಳಿದ್ದ ಎನ್ನಲಾಗಿದ್ದು, ಆತ ಹಚ್ಚಿದ ಎಣ್ಣೆಯಂಥ ಅಥವಾ ಕುಡಿಸಿದ ನೀರಿನಂತ ದ್ರವದ ಅಡ್ಡ ಪರಿಣಾಮದಿಂದ ಆತ ಹೇಳಿದಂತೆ ಕೇಳಿ ಹಿಂದೆ ಮುಂದೆ ಯೋಚಿಸದ ದಂಪತಿಗಳು ತಾವು ವ್ಯಾಪಾರ ಉದ್ದೇಶದಿಂದ ಮನೆಯೊಳಗೆ ಇಟ್ಟು ಕೊಂಡಿದ್ದ ರೂ 63000 ಹಣವನ್ನು ಅಪರಿಚಿತ ವ್ಯಕ್ತಿಗೆ ನೀಡಿದ್ದು ಸ್ವಲ್ಪ ಸಮಯದ ನಂತರ ಮಂಕಾದಂತಿದ್ದ ಅವರು ಸುಧಾರಿಸಿಕೊಂಡು ನೋಡುವಷ್ಟರಲ್ಲಿ ಆ ವ್ಯಕ್ತಿ ಅವರ ಮನೆಯಿಂದ ಹೊರಟು ಹೋಗಿದ್ದ. ಆಗ ತಾವು ಮೋಸ ಹೋಗಿರುವುದು ಅರಿವಿಗೆ ಬಂದು ಆ ಅಪರಿಚಿತ ವ್ಯಕ್ತಿ ನೀಡಿರುವ ಮೊಬೈಲ್ ಸಂಖ್ಯೆಗೆ ಕರೆ ಮಾಡಿ ಹಣ ಮರಳಿಸುವಂತೆ ಕೇಳಿಕೊಂಡರೂ ಆತ ಹಣ ಮರಳಿಸದ ಕಾರಣ ವೀಣಾ ಭಟ್ಟ ಅವರು ಅಂಕೋಲಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಪ್ರಕರಣ ದಾಖಲಿಸಿಕೊಂಡ ಅಂಕೋಲಾ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಔಷಧ ಮಾರುವ ನೆಪದಲ್ಲಿ ಬಂದು ,ದಂಪತಿಗಳನ್ನು ಯಾಮಾರಿಸಿ ಕರಾಮತ್ತು ತೋರಿ, ಅದೇಗೋ ಮತ್ತು ಬರಿಸಿ ಇಲ್ಲವೇ ಮಂಕು ಬೂದಿ ಎರಚಿದ ಆ ನಕಲಿ ವ್ಯಕ್ತಿ ಇಲ್ಲವೇ ಅಂತವುದೇ ಬೇರೆ ಯಾರಾದರೂ ನಿಮ್ಮ ಮನೆ ಬಾಗಿಲಿಗೆ ಬಂದೂ ಮೋಸ ಹಾಗೂ ವಂಚನೆ ಮಾಡುವ ಸಾಧ್ಯತೆ ಇರುವುದರಿಂದ ,ಅಪರಿಚಿತರೊಂದಿಗೆ ವ್ಯವಹಾರಿಸುವ ಮುನ್ನ ಗ್ರಾಹಕರೇ ಎಚ್ಚರ ಎಚ್ಚರ : ? ನಿಮ್ಮ ಸುತ್ತಮುತ್ತ ಇಂತಹ ಸಂಶಯಾಸ್ಪದ ವ್ಯಕ್ತಿಗಳು ಕಂಡು ಬಂದರೆ ಕೂಡಲೇ 112 ತುರ್ತು ಸಹಾಯವಾಣಿ ಇಲ್ಲವೇ ಹತ್ತಿರದ ಪೊಲೀಸ್ ಠಾಣೆಗೆ ಮಾಹಿತಿ ನೀಡಲು ಕೋರಲಾಗಿದೆ.

ವಿಸ್ಮಯ ನ್ಯೂಸ್ ವಿಲಾಸ ನಾಯಕ ಅಂಕೋಲಾ